قصة حب اماراتية:راكان لبست خاتم حبي وصار دم .....

ولكــــــــــــــــــــــــم

مياري وبحزن: خبرني ...
راكان ويخبرها السالفة كلها..
مياري: خلصت؟
مياري فخاطرها: مب مصدقة !!! هذا كله يستوي ومن طليجته!!! عنبوا فيلم هندي!!!
راكان : هي نعم خلصت ... وانا طال عمرج احبج واباج اتكونين حرمتي اليوم قبل باجر ... والحينه بعد!!!
مياري كانت منزلة راسها ... ويوم عج الكلام ... رفعت راسها.. وقالت: راكان؟
راكان: عيونه؟؟
مياري: راكان لبست خاتم حبي وصار دم ... وانا اقولك الله يهنيك ويسعدك واتحصل بنت الحلال ... وانا هب موافقة اني اتزوجك.... لاني من عرفتك وانا اطيح فمشاكل...... واخر مشاكلك فضيحة!!!..... اتحراني ما اشوف معناتها ما احس بكلام الناس يوم هم يتصاصرون وكأني ما اسمعهم بعد؟....يوم يقولون : وحليلها هدّاها لانها ما اتشوف!!! !!! وانا كنت معجبة فيك ... هي نعم معجبة فيك ... لكن يا حسافة!!!

وتنزل دموعها...
راكان: مياري!!! غناتي!!! انا وشلي؟؟؟
مياري وهي فغصتها : مابا شفقتك.. انا مسامحتنك على كل شي ... بس اظهر من حياتي...
راكان: دخيلج والله لأسير اييب المطوع الحينه!!!
مياري: كنت تقدر ماتركب الموتر ... ليش ركبت؟ مب لازم اتقولي ... سامحني لاني ماباخذك ... عنود!!! عنود!!!!
وماخلت راكان يكمل كلامه ... وعنود يت خذتها ... وودتها غرفتها...
وراكان فخاطره: ليش خليتيني؟؟!!! كنتي معجبة فية!!! انا ما خنتج يا غناتي!!!!

ورد البيت وهو متكدر وحاط فخاطره ... ويفكر كيف يخليها له... ومياري من ردت غرفتها وهي تصيح ... ومرت الايام وخلق الله اتكلموا بسالفتها.... وصارت علج بحلوج االناس...ومياري نست راكان... والتهت بالاهل.. وبدت تشتغل ويالعنود...وودرت شغلها القبلي...كانت تعطي ملاحظاتها مثلا انه كيف يتصور الفيديوكليب على حسب الاغنية وأي قصة بيستلهمون منها قصة الاغنية... وكانت العنود تظهر فلقاءات صحفية قليلة وتشكر مياري ... ومياري ماتكون وياها .. عسب ما تسبب لها الاحراج... وبعد 3 شهور قررت مياري اتسير اتعالج عن عيونها ... مادامها هي بخير واتعافت ليش

ماتسير اتسوي العملية!!!ونسيت اخبركم ... راكان ما نسى مياري... كانت دوم فباله فكل لحظة ... وكان يحس انه كل ما يفكر فيها كأنها اتحفزه على انه يشتغل ويرتقي فشغله... وهو الحين مدير شركات ابوه ... وابوه اتقاعد وخلى كل اشغاله كلها على عاتق راكان ... وراكان كان يهمل فعمره ... وسارة كل ماياها تدمر زيادة... ويا التيلفون... كل يوم ويا حد ... وفيصل بعد ما درى بفسخ العرس استانس ... ودرى عن طريج خالد ريل العنود ... انه مياري بتسير تتعالج ... ويوم بترد بتاخذ دورات في الانجليزي فمعهد....وهني تبدا القصة....

اتجهزت مياري حق السفر وامها وابوها بعد ... والعنود مارامت اتسافر لانها فشهرها السابع ... ويوم وصلوا ألمانيا ... تنومت مياري في المستشفى بعد 5 ايام ... وسوولها العملية بعد اسبوع من الفحوصات المتأخرة قبل العملية..ونجحت العملية ... بس ما فجوا الشاش اللي فعيونها ... لازم ترتاح ... وبومياري وام مياري على اعصابهم ويوم اطمنوا ... طمنوا الاهل كلهم وحتى طمنوا عايلة بوراكان ... لانه بوراكان حاس بالذنب من اللي صار ... ويوم قامت من البنج ... استانست وحمدت ربها ... ويابولها سجادة عسب تصلي وتشكر ربها ...
ويوم تيلس روحها تتذكر كيف راكان اييها المستشفى... حزت مافجوا الشاش عن عيونها ... ام مياري اتصيح من الفرحة وتيهيل...
بومياري: دموع التماسيح!!! ههههههه مريم بس عيب نحن مب في بلادنا بيخافون خلق الله بيتحرونج اتزاعجين...
مياري تضحك ... قامت تحط يدها على عينها وتشوف نفسها ... ومستانسة وشاجة الحلج ...الدكتور يكلمهم بالانجليزي: لازم ترتاح كم من يوم وبعدين اذن لها تطلع من المستشفى...
ام مياري: غناتي .... انا بروح الشقة ... شو بغيتي اسويلج عشاء؟
مياري: فخاطري لقيمات...
ام مياري متعجبة: حسبي الله على شرج من وين اييب لج لقيمات ؟ بعده رمضان!!! يوم بنرد البلاد بنسوي لج اللي تبينه
بومياري: ههههههههه البنية هلعة ... سوي لها اي شي من الفرحة بتاكل اي شي..
مياري: صدقك يابويه ...
وراحت باسته على راسه وباست امها على راسها..ام امياري: لا تبوسيني على راسي بعدني شباب!!!
بومياري: اتصابوا العيايز!!!
مياري مستانسة وويها انوّر ... وتيلفونها ما سكت من الرن ... ووصلها مسج واتغير ويهها من منو...
من ابراهيم: سامحيني ... والحمدلله على السلامة يا غلاتي...
واهلها طلعوا عنها... واتصلت على طول به ... وهو يوم شاف رقمها ما صدق ماخلاه يرن...
ابراهيم: هلا بالغلا!!!
مياري: هلا
ابراهيم: حبيبتي سامحيني على...
مياري اتقاطعه: مسموح يالغالي ( وعيونها تدمع))
ابراهيم: فديت ربي اللي خلقج والله يخليج النا ... غناتي انا بحجز وبييكم...
مياري ودموعها تنزل: لا فديتك لاتي ولا شياته ... انا اللي بييك...
ابراهيم: غناتي لا تصيحين ... دموعج غالية ... اغلى من الدانة نفسها....
مياري: خالي فديتك ... والله... بغيت انك تستقبلني في المطار وبس.... ابغي اشوفك...
ابراهيم: انتي ماتطلبين الا تم بالحل !!!!
مياري: سامحني ببند عنك .... بسير اخذ دوايه ....
ابراهيم: ميااااااااااارووووووووووه اتحبيني؟
مياري بمصخرة: احبك حب محد درابه ههههههه
ابراهيم : اخاف الا دروبه!!!!
مياري : هههههههه
ابراهيم: يالله فحفظ الرحمن

بندت عنه وحست براحة نفسية فظيعة ... لانها وايد كانت اتحاتي خالها ... والحين وصل دور راكان ... اللي ما حتى طرش لها مسج ... واصلا ليش يطرش لي مسج؟ هو منو؟ ريلي؟ خطيبي؟ والله اني غبية ... يمكن عرّس !!! ...لازم ما اهتم بهالانسان .... اصلا استخارتي فمحلها... يعني لوسمعت كلام ربي ... وماوافقت فأول الطريج جان ما اتشرشحت جذيه !!! لكن الله كريم ...الله بيوفقني ان الله راد ... وسارت اتصلي .. وبعدين سارت تتسبح ... ويوم عجت ثيابها .... انذهلت من اللي تشوفه فجسمها ... انه جسمها كله ندب يعني باللمس ما ينحس ... بس شكلها يخوف... ويلست اتصيح وتتذكر الضرب بالعصا اللي ياها ... وتنتفض مكانها ...ونامت نومة لين الصبح وما اتعشت

وبعدما كملت فترة في المستشفى يوملها مسج من سارة:الحمد الله على سلامتج..حست لحظتها مياري انة سارة مغصوبة انها تكتب المسج وطوفت السالفة على خير..أذن لها الدكتور انها تروح..واتشرت هدايا للعنود و خالد و سارة و أم سارة و أبو سارة و لابوها و امها..ولهند و بوراكان و راكان و ام راكان و اللى يشتغلون وياها في الشغل..و ما خلت شي فخاطرها كله بطيب خاطر حتى لو كان شي بسيط بس اهم شي انها اتذكرتهم..وخالد كان يتكلم ويا فيصل..

فيصل: شو رايك يابونورة نسير البر يوم الخميس شوية نتسابق بالمواتر؟؟
خالد: ياريال انته ما اتوب ؟؟!!! اخر مرة مسوي حادث زين مارحت فيها!!!
فيصل: هههههه عادي يالله ياريال!!!
خالد: ماروم بنت عمي بترد من السفر...
فيصل اتغير ويهه وفخاطره: ياويل حالي !!!
وقال: منو؟؟؟ اي وحدة؟
خالد: مارية!! اللي يت هذيجي المرة المطار ويلست تسمعكم !!! سوّت العملية ونجحت...
فيصل فخاطره: فديتج يامارية !!! مارية اسمج؟؟... ياويل حال فيصل عليج يامارية!!!
فيصل باستهبال: اها ... ان شاء الله ترجع لكم بالسلامة ...
خالد: ان شاء الله ... انته ما اتعرف شو عانت هالبنية من مشاكل ... كله بسبب الجلب راكان!!!
فيصل عصب ويدافع عن ربيعه: لا تظلم الريال !!! تراه فسر لكم ليش مايا الملجة الظلم شين!!!
خالد: واتدافع عنه؟ اسكت ياخي ولا خلنا انغير الموضوع!!!
فيصل: انزين انته متى بتسير المطار؟
خالد: ها؟ ليش تسأل؟!!!
فهذيجي اللحظة فيصل يبا يدور على تفسير وحصل : لا ياخي .. انا اتخبرك عسب اذا بتسير العصر ويايه...
خالد قاطعه: فويصل تراهم بيون على الساعة 9 ... يعني لازم انام لي كم من ساعة ....
فيصل: اها زين زين... بس مرة ثانية نتسابق يالجبان ... اووه اووه!!! بونورة نتفاهم بعدين الوالدة متصلة!!!
خالد: الشيخة؟ سلم على شيختنا !!!
فيصل : ههههههه ان شاء الله يبلغ ...بند عن خالد ويكلم امه
فيصل: مرحبا ملايين ولا يسدن فذمتيه ... مرحبا!!! مرحبا بالشيوخ!!!
ام فيصل: يالله بالستر !!! وين نازلة الشمس؟
فيصل: هههه من اليمين واليسار ...
ام فيصل: فويصل شبلاك شاج الحلج؟
فيصل: امي لاتظهرين احين ياينج ابا اكلمج...
ام فيصل: بتتأخر ؟ انا بيلس اطالع الاخبار ما احب تفوتني...
فيصل: ياحبج حق الاخبار !!! اصبري عطيني عشر دقايق وياينج...
ويشخط ويلات ويسرع ما خلى رادار مامر عليه ... كانت سرعته فوق ال 200... ويوم وصل البيت ... باسها على راسها...
ام فيصل: فديتك والله
فيصل: امايا... احم احم انا ابا اعرس...
ام فيصل: واااايه فديتك !!! بنت منو ؟ ولا انا بختار لك محصلتلك شيخة عليها جمال الله يحفظها..
فيصل: امايا حاط فبالي وحدة...
ام فيصل ومعصبة: وييه حسبي الله عليك اتكلمها وتباها ... اتهبي ماتاخذها!!!
فيصل: هيّدي (شوي شوي) يامايا ما اكلمها ولا شياته ... انتي اتعرفيني مالي خص في الخرابيط ... بس هالبنية شفتها وعيبتني ويوم سألت عنها ... ما بحصل مثلها...
ام فيصل: ماخبرتني من قوم منو؟
فيصل: (------)
ام فيصل: انزين انا بسأل عنها وبرد عليك...
فيصل: اميه تراها بترد باجر من السفر
ام فيصل: وانته شدراك؟ وليش مستعيل؟
فيصل : يامايا ولد عمها ربيعي !!! وانتي كلمي ابويه ... وانا الصراحة متخبل على اخلاقها...
امفيصل اتطالعه من طرف عينها: على اخلاقها؟ يصير خير!!!
فيصل: اميه هب اتأخرين ... انتي شيخة !!! يعني واسطتج قوية!!!
ام فيصل: عيب ياولد!!!
فيصل: ههههههه.... ان شاء الله طويلة العمر ...
ام فيصل: هي !! غد ريال!!!
ورد لغرفته واتسبح وطاح على السرير ... يفكر ... عيل اسمج مارية.؟اسم غريب!!! لبنية بريئة وحلوة مثلج لكن الزين للزين .. ويسمع اغنية

وقرر انه يسير المطار وبدون مايدري خالد.. واليوم الثاني الساعة9 في المطار .. يتريونها ( ابراهيم وخالد والعنود وفيصل من بعيد )
العنود اتأشر وتصارخ: مياري !!! مياري!!!
مياري: حبيبتي!!
وتمشي مشيتها السريعة..
فيصل فخاطره: يا ويل حالي عليج يامارية ماغلاتج...
ابراهيم حضنها جدام خلق الله
فيصل فخاطره : منو هذا ؟ اللي تحضنه؟ انا وين شايفنه؟ الغيرة تنهش قلبي... اوووه ماغباني ... هذا خالها!!!
وسلموا على بعض ... وفيصل روّح من شافها وحس بالراحة ... ويوم توها بتركب الموتر تسمع صوت اتعرفه ...
------: مياري؟
ماصدت ورا بس احمر ويهها لانها مانست هالصوت؟؟

وثواني وصدت مياري صوب راكان: راكان؟؟
راكان: الحمدلله عالسلامة ..
بوراكان ومعصب : مامن بينكم كلام...
مياري: هيّد يا بويه اركب الموتر !!! وانا الحينه بيي...
وصدت صوب راكان واتشوف ويهه متغير وتعبان شكله....
مياري وتبتسم: الله يسلمك..
راكان فخاطره: فديت هالويه والصوت والابتسامة اللي ترد الروح..
راكان : حبيت اسلم عليج ... واطمن عليج يالغالية .. سامحيني عالازعاج ... فمان الله..

وعيونها تلحقه ... وفخاطرها تقول.. لا تروّح ... بس المشكلة انه هو روّح ... وركبت الموتر وهي نص حزينة ونص مستانسة فنفس الوقت ... يلست اتسولف ويالعنود... لين ماوصلوا البيت ... وحصلوا البشاكير واقفين برع
العنود: بسم الله الرحمن الرحيم شو بلاهم؟؟!!!
ام مياري تصارخ : واعثرتي!!! لا يكون بشكارتي شاردة؟؟
بومياري: هيّدي يا حرمة كلهم موجودين ,... هههههه يستقبلون الشيخة بنت الشيخ ...
خالد ومياري والعنود يضحكون عليهم وينزلون ... واتسلم عليهم وبشكارة مياري (جيني)
جيني: كيف هالج ماما؟
مياري: زينة ... شحالج جيني؟
جيني تهز راسها : همدلله !! ماما انتي في شوف؟؟
مياري: ههههه هي في شوف!!
جيني: ماما عيون مال انتي لون جير ...
فهذيجي اللحظة خالد يصارخ : سيييييييييييييييييييييييييييو طــــــــــــــــــاخ .... طاعوا الجذب!!! نقعت صاروخ من الجذب ... جيني ماما مالج سارت اتسوي operation مب اتغير لون عيونها هههههه هبلة!!!
ويتضاحكون عليها
مياري: حسبي الله على شرج يا جيني !!!
العنود : هب سهلة!!
خالد: مياري عقب ما ترتاحين محضر لج مفاجأة جيه على الساعة 12
مياري : شو؟ شو؟ دخيلك قول !!!
خالد: بوسي ايدي !!!
مياري: خسي!!! بوس ريلي!!!
خالد: صبري وببوس ريلج...
سار ياب قطوة فايده
مياري واقفة ورا العنود : اييييه ياع مادانيهن ... قوم عني امايا!!!
خالد: ههههههه بتبوسين ايدي ولا لاء؟
العنود: هههههه صدق انكم يهال ... خلودي بس عاد خلها!!!!
مياري: واسطتي احم احم قوية فديتها هي واللي فبطنها ...
وردوا داخل ...وسوالف وضحك في الميلس ابراهيم وخوات سارة الصغار ( 3 يهال سمية وحصة وسعيد ) وسعيد دومه فحضن مياري ... عمره 5 سنين ... ( سمية وحصة توائم عمارهم 9 سنين فرق بينهم دقايق ) والعنود وخالد ويرانهم البنات ... هن بنتين كانوا يايين يتحمدون لمياري بالسلامة .. هدى وبثينة.. وعلى الساعة 12 يرن تيلفون خالد...
خالد: برهوم تعال برع اباك بكلمة راس
وظهروا برع
ابراهيم : خير ؟
خالد: انا حاط شلق في دبة الموتر .. تعال بنشلهن وبناديهم ...
ابراهيم : يا سلام !!! يا خي انته خطير!!!
وساروا ويابوا الشلق والولاعة ونادوهم ...
خالد: عنود!!! عنود!!!
ابراهيم: مياري!!! مياري!!! هاتي البنات وياج برع!!
وابراهيم حاط عينه على بنت يرانه بثينة ( وهي مب وياه موول) .. وكان متخبل عليها من يوم هم يهال ... بس ماكانت في فرصة انه يفاتحها انه يبا ياخذها ... بس طبعا عقب اللي سواه فمياري ... كيف بترضى اني اخذها... وظهروا البنات والصغارية ...
مياري: الله شلق!!!
سعيد : صاروخ !!! بووف!!!
ابراهيم : يالله خلوا مياري تفتتح التنقيع ...
خالد: العنود تمي مكانج ولا تتحركين يلسي عالكرسي
العنود: ليش انا ابا بعد شمعنى هم؟
خالد : ماماتي انتي حامل ولا نسيتي؟
العنود : لا تخاف علية ما بييني شي ... وسيدة بركض ...
خالد: عنودوه ويهّد !!!! خلاص غناتي بيلس حذالج وبطالع حالي حالج ...
مياري : يا عيني ... اتغزلوا شوي ويا بعض لين ما اخلص
ويوم وصلت مياري فنص الحوي ولعت على كمية وكانوا البنات كلهم متيمعين وياها وشردوا ( طـــــــــاخ طـــــــاخ طـــــــاخ)
بثينة : امايا الحقي علية !!!
وحليلها بثينة يوم كانت تركض في من الصواريخ والشلق سارن فوق وتحت وفي منهن تفرقن يمين ويسار وواحد من الصواريخ اندس فتنورة بثينة وهي تصارخ .. كلهم منصدمين ويطالعون شو بلاها ... وابراهيم يركض صوبها ويمسك تنورتها وينفضها وهي تضربه بايدها على راسه
ابراهيم : يدج!!! خليني اخوّز الشلق!!!
والصغارية يتضاحكون وبثينة مب مخلتنه تضربه .. العنود من الزياغ سارت تيب نعال وكفختها على جسمها مرتين لين طاح االشلق والله ستر انه ما نقع ... ومياري تضحك : اييي بطني يعورني صدق انكم فيلم!!!
خالد: هههههه ( وبعد نزل راسه وسار داخل من الاحراج وحتى ابراهيم )
بثينة : عنود جيه شو اتحريني صرصور تضربيني بنعال ؟
العنود : احمدي ربج مانقع فتنورتج ... جان دوختي!!!
هدى : هاهاهاهاهاهاي ... بثون ...عشتي اختاه سويتي فيلم هندي ولا لاء سويتي رسوم متحركة..
سعيد ياي صوب بثينة : خالوه؟
بثينة : ها حبيبي؟
سعيد : بنقع شلق ... ملة ثانية ... نباه يندس فتنورتج ... ملة ثانية ... علشان علشان دوووف
بثينة : ردوني البيت !!! انتفخ راسي منكم !!
وردت البيت هي واختها ... وصلهم الدريول

شو بيستوي بين فيصل ومياري ؟ في المعهد؟؟؟

وعلى الساعة وحدة في الليل اتصلت مياري حق بثينة ..
بثينة : مرحبا ..
مياري: والله اسفة غناتي ... ماكان قصدنا نضحك عليج بس الموقف!!!
بثينة : حصل خير
مياري : اقولج انتي متى بتفكرين ببرهوم عدل؟ حرام عليج اللي تسوينه فيه ..
بثينة : بس!!! اباه يتعذب!!!
مياري: تراني بخبره .. حرام .. ولو بنية رسمت عليه .. او هو حب وحدة غيرج ؟
بثينة : الله لا يقوله!!! بس شويه احب اعذبه ... بس غلاته فقلبي ...
مياري : كيفكم اثنينتكم ما تبينون حق بعضكم اقول بس الله يستر منكم!!!
بثينة : بتشوفين اخر شي بيعترف ...
مياري: كيفكم .. انا ما بتدخل ... بس حبيت انصحج اتيّودي فيه بايدج وريلج لانج مابتحصلين مثله
بثينة : طاعوا منو يتكلم ولا كأنه اذاج فيوم من الايام !!!
مياري: انا نسيت كل شي!!
بثينة : جذابة ما نسيتي هب علية!!! وجسمج يبين بعد اثار الضرب..
مياري تصيح : بس!!!
وبندت التيلفون وهي متضايجة وانهارت مكانها ( واثار النفسية للحادث بعدها فيها ) وبثينة حست بالذنب من اللي قالته ... واتصلت على مياري وحصلت موبايلها مغلق .. وطرشت مسج لها: السموحة منج

(عند راكان)

راكان يكلم هنوده : هنود كلمت مياري
هند: يا قوات عينك !!! وين !!؟؟؟ ليش؟؟
راكان: ليش انا ماسويت شي غلط!!!!
هند: لا سويت وشي جايد بعد!!! انك كلمتها ... ترضى حد من الشباب يكلمني؟؟
راكان: لا ما ارضى عليج ... ولا ارضى عليها
هند: عيل؟ هي مب مختلفة عني ... نفس الشي .. الناي اييون من الباب
راكان سكت
هند: ياخوي انا اقولك هالكلام عسب ماتييب الكلام لها ... كفاية الفضيحة اللي استوت
راكان : انا اباها...
هند: خلاص انا بحاولوياها بس لاخر مرة ...
راكان: تسلمين فديتج ...
هند: بس توعدني ... اذا هي مارضت تنساها وانا بخطب لك الاحسن..
راكان فخاطره : مافي احسن منها...
راكان: ان شاء الله توافق...
وبعد اسبوع من وصولها كانت الساعة 4 الفير في مستشفى دبي وعند مياري حالة طوارىء... العنود بتربي قبل الاوان ..مياري وامها و ابو العنود ام العنود وحماتها وخالد متوتر...وبعدين دخلوا ام العنود داخل .. وبعد ساعتين ونص طلعت ام العنود : بنية!!! بنية!!! بالبركة عليك يابونورة ...
خالد واختفى عن ويهه التوتر والعصبية وردت الابتسامة على ويهه ... مانصّخ راح داخل ولقى العنود نايمة ... والبنية ودوها الحضانة ( الشيشة) وراحوا كلهم يطالعون البنية .. البنية صغيرة وايد وحلوة وتصيح وايد...
مياري وتصيح: ياويل حالي عليج محلاتج!!!
ام العنود: فديتها الله يخليها لهم
ام مياري: امين والله يحفظها
زمياري بتبات عند العنود والبنوتة .. ويوم وعت العنود ...
مياري: مرحبا !!! مرحبا!!! مرحبا!!!
العنود تبطل عيونها بكسل : وينه؟
مياري:خالد؟ مب موجود..
العنود: قصدي البيبي
مياري: حبيبتي يبتي بنوتة حلوة فديتها تشبهني...
العنود: بس انا قالولي يوم افحص ولد!!!
مياري: مغلطين حبيبتي
العنود: لا هم اللي مغلطين انا يايبة ولد..
مياري: حسبي الله على شرج !!! بنوتة حبيبتي ومحد مربي غيرج في المستشفى..
العنود: ييبولي ولدية!!!
مياري: عنودوه!!! شبلاج؟ تخبلتي؟
العنود تصيح: كان فخاطري اييب ولد عشان خالد!!!
مياري: شو هالينون ؟!!! خالد متخبل عالبنية .. جان ماتصدقين تعالي براويج شي!!!
لبست العنود وجايتها ومستندة على مياري تساعدها ... ويمشون شوي شوي ...
لقوا خالد واقف وشال بنته يكلمها ويلاعبها...
خالد يكلم ينته : الكتكوتة !!! الحلوة !! رمسيني غازليني!!! غاوية مثل امج...
ومياري اتطالع والعنود اتطالعهم وتبتسم وراحت صوبهم وخلتهم مياري وراحت الغرفة

وبهالمناسبة حبيت اهدي هالاغنية لخالد والعنود وبنتهم
http://www.farsuae.com/song/m7amad_a...amad_a7med.ram

وبعدين يت العنود ويابنتها ويا خالد بعد
خالد: ها مارية ؟ ماخبرتينا ؟ شو بتسمين بنتنا؟
مياري: انا؟. مالي خص هذي بنتكم!!!
العنود: وانتي امها بعد !!! شو بتسمينها عن الغلاسة!!!
مياري: ترا خالد ينادونه بونورة توكلوا وسموها نورة...
خالد: مب عسب جيه نحن نباج انتي تختارين الاسم...
مياري: مادري..شورايكم ف الغلا؟
العنود: رايج وهداية الله اسمها غاوي ... احم احم ام الغلا
خالد: شو الغلا ؟ مانعرف اندلعها ...
ابي غلاي كله ... قصدي غلا خالد بن ركاض ...
العنود: خلاص تم...
خالد: شو نسوي ...مع انه كنا نبا اسم بدوي .. لكن حكم قرقوش .. خلاص انا ساير بسجلها وبعدين بروح البيت..
وراح باس العنود على راسها
العنود: اتحمل على عمرك فديتك
خالد: ان شاء الله ام الغلا ...
ويوم روح سولفوا العنود ومياري..
العنود: اتصدقين احين مسؤولية زيادة علية وعليج
مياري: اكيد...
العنود:انتي اتعرفين عن شو اتكلم؟
مياري: عن الغلا...
العنود: صح بس في شي نسيناه اتحيدين اخر اتفاق اتفقناه
مياري: اوييه ويالفرقة ... نسيناه باجر التصوير ...
العنود: باجر انتي سيري واخرجي الشغل كله ... انا الصراحة ماروم ... يمكن خلاص استقيل من الشغل تعبت!!!
مياري: عنودوه؟؟ مب علية !!! انا ما اعرف اخرج عمل...
العنود: ميرووه ... شو هالكلام ؟ جذابة اتعرفين واحلى عني بعد لكن الحينه نحنا فورطة وانتي لازم تظهرينا منها ... بيكون اول عمل واخر عمل ..
مياري: يا ربي سترك ... بس انا باجر بسير اسجل فمعهد ابا ادرس انجليزي شو الحل؟
العنود: اجلي السيرة للمعهد لليوم الثاني ...وباجر تطلعين الساعة - خذي موتري وهالله هاللهبالطريج وين بتصورين؟
مياري: افففف مادري يبالها تفكير ... يمكن اصور في البداير
العنود: فكري .. انا الصراحة ماروم افكر بأي شي غير بالغلا وابوها..
نامت العنود ... وراحت مياري بتفكيرها بعيد اتفكر بقصة للفيديو كليب..
والصبح الساعة 5:30 قامت غلا من النوم تصيح ... وشلتها مياري تسكتها ... وراحت تتسبح .. وطلعت من حمام المستشفى وتلقى غلا فحضن امها وتلعب وياها...
مياري: صباح الخير ام الغلا...
العنود: صباح النور ام حمد
مياري: وين سويج الموتر؟
العنود: هذووه ... افطري .. اول وبعدين سيري .. صبري بعطيج رقم الريال عسب تتصلي به..
مياري: عطيني ... بس اسفة .. ما اتنزل اتصل حق ريال .. خله هو يتصل
العنود: وين مخج ميروه مايعرف رقمج؟ خلاص انا بدق له وبخليه يدق لج
مياري: ايوا جيه احسن ... هم من وين؟
العنود: ظبيانية .. وكم من واحد من اليويلة مال اغنية عيضة اللي صورتها في المطار...
مياري : ربي سترك.. الصراحة لازم اكون قوية لانه وايد شباب..
وطلعت مياري من عندها وتتصل حق ام سارة ...
مياري: الو؟ صباح الخير خالوه ؟ شحالج؟
ام سارة: صباح النور واااااااااااااايه فديتج ... يسرج الحال غناتي ...
مياري:خالوه جهزي الصغارية بوّديهم ويايه
ام سارة: وين بتوديهم؟ شياطين بيأذونج
مياري: بوديهم البر بصور فيديو كليب باخذهم وبخلي سعيد ايوول
ام سارة: واايه ... سعيد؟ اسميه بيوول خلاص تعالي وخذيهم ..
ومرت وخذتهم....
ام سارة: هالله هالله بالطريج لا تسرعين اتحملي على عمرج
مياري: اكيد خالوه ويايه امانة
وفي الطريج حاطتلهم اغاني وسعيد يرزف والبنتين ينعشن ويغنن ومياري تضحك عليهم

ووصلت الشركة وماتزلت الموتر ... دقت على عنود
العنود: هلا ميرووه
مياري: اشوف المواتر والشباب برع وينه صاحب الفرقة؟
العنود : بيتأخر شوية عليكم ... انتي خذي الستاف كله واليويلة وسيري الموقع وهو بيدق لج
مياري: جيه بعد يتأخر ... وليش هو ولد منوه عسب يتأخر ... اذا اتأخر بوقف الشغل كله
العنود : ههههههه شبلاج مستحمقة؟. والله بييي واسمه فيصل بعد
مياري: من حلات ويهه
العنود: جيه شفتيه انتي؟
مياري: لا ولا ابي اشوف رقعة ويهه .. اللي يوعد انه بيي في الموقت المحدد ايي بس مب جيه ايأخرنا
العنود: خلاص استحملي جذيه الشغل
مياري: امحق شغل... انا ببند بسير اكلمهم انهم يلحقوني وبوديهم يالله فداعة الله
العنود : الله يحفظج
نزلت من الموتر وهي كاشخة... واليويلة يطالعون منو نازل من الموتر ... ونزلت الصغارية وياها...وسارت صوبهم..
رمست الستاف لانهم كلهم يعرفونها ... وبعد ما خلصت منهم سارت صوب اليويلة ... وكانوا يتريونها..
مياري: السلام عليكم
سعيد ما نصخ سيدة رد عليها: وعليكم السلام
وكل الشباب ردوا السلام
مياري: اخوي انا مارية وانا بقبض الشغل ونحن بنسير الموقع الحينه ... وما عرفت اسمك الشيخ؟
سعيد: الشيخة اسمي سعيد بن راشد
مياري: عاشت الاسامي انا الحينة بطلع بموتري ...محمد
وايي واحد من الستاف مصري يركض
محمد: ايوه حضرتك؟
مياري: محمد خذ رقم الشيخ سعيد وانا اي شي اباه راح اقوله لك واتقوله لسعيد
سعيد : وليش اتكبرين السالفة؟. خذي انتي الرقم ودقي
مياري: هذا هب من طبعي الشيخ والسمووحة ... المهم نحن بنسير البداير هناك بنصور جان بتخبر الشيخ اللي ما يا ..
وقفط ويه سعيد... ومياري نزلت راسها وركبت الموتر
سعيد:ان شاء الله
وكبرت وايد فعينه بسبب هالشي

وراحت مياري ركبت موترها واتحركت ... والصغارية مرتبشين من الاغاني .. وهم في الطريج .. يلف عليهم واحد بموتره يبغي يتجاوزها.. مياري ضربت بريك .. والله ستر انه سعيد محزمتنه وهي ردت على جدام والبنات الصغار ردت على ورا... وسعيد ربيع فيصل وواحد من الشباب اللي ويا سعيد : الله يغربله زين ماروح البنية واليهال
سعيد: جلب!!!
مياري تنزل جامتها وتضرب هرن: والسم اللي يسمك!!! ان شاء الله ... عنبوا ماتشوف عمّي؟؟ يعلك بحرمة عورة!!!
وهذاكي اتجاوزهم وروّح .. وهي طول الوقت معصبة وضارب عندها الجايج
ويصيح تيلفون مياري: ها محمد؟
محمد: الحمدلله عالسلامة حضرتك..
مياري: الله يسلمك... بغيت شي؟
محمد: اااه حضرتك ... اصدي الشيخ سعيد اتصل وآل عاوزين نروح نشتري من دا المكان بتاع الشيشة..
مياري: هاا؟ اوووه خلاص اقرب محطة بننزل وبنشتري
وبندت عنه ودقت حق امها
مياري: مرحبا .. مرحبا بالشيوخ؟ صباح الخير ام مياري ...
امها: يالله بصباح خير .. شحالج غناتي؟
مياري: امايا يسرج الحال... بغيتج تطبخين لنا لاني سايرة موقع التصوير وشكلنا بنتأخر...
امها: غربالله مذهبج يا ميرووه ... علمج ابوج هالطبع؟ ما خبرتيني بسير اخذ ذباح حقهم...
مياري: عوذ بالله!!!! امايا غدا بس هب عزيمة ... الا بيرزفون وخلاص...
امها: انا بسير الجمعية اتشرى اغراض الغدا .. كم نفر؟
مياري: هههههههه نفرات 35 نفر او اكثر .. وانا بطرش لج باص الستاف وعطيه الاغراض..
امها: عن الطنازة!!! احشمي يابنية!!! بخبرج انتي شالنج الهوا اشوفج ؟ اغاني وحالة؟
مياري: هههههههه امايا الصغارية وياية اخليهم يرتبشون شوية ... الغالية انا وصلت سامحيني...
امها: مسموحة ... الله يحفظج
ومروا المحطة ونزلوا الصغارية وعطتهم الفلوس وهي مارضت تنزل يلست اتكلم محمد.. ويوم خلصوا واتشروا اتجدموا لمدة ربع ساعة ووصلوا ..وقف سعيد حذال موترها ... ونزلوا الجامات...
سعيد: الشيخة اي بقعة؟
مياري: الشيخ بنتجدم شوي مانبا صوب الدراجات ... نبا بعيد..
سعيد: يالله توكلنا...
واتجدموا .. وشوي ابعد عن مكان الدراجات .. ووقفت الموتر .. ونزلت الصغارية ..وبرزوا خلق الله وطلعوا اغراض التصوير ... ومياري تعطي الستاف التعليمات .. والشباب واقفين روحهم ويا الكلاشن والعصي...وساروا الصغارية عند الشباب...
وسعيد يتصل حق فيصل: الووو ..فيصل
فيصل: ها وصلتوا؟
سعيد: ياخي وصلنا .... انته وين؟ عنبوا مايسوا عليك هالموتر اللي بتظهره؟
فيصل: شو اسوي... الوكالة كانت مبندة...واحين توني يالس اكلمهم .. ها شخبار المخرجة اليديدة.؟
سعيد: كل شي تمام بس شابة ضو... انته تعال وبتحصل احلى مفاجأة..
فيصل : ترا مفاجآتك مثل ويهك هههههههه...انا العنود دقت لي وعطتني رقم ربيعتها لانها مربي ... الله يستر من شعشبونة ..يوم انها شابة ضو
سعيد: هههههههههه شكلك بتسحب كلامك من توصل هههههههه وين راكان؟
فيصل: هذوه حذالي تباه؟
راكان: يالمعفن وينك؟
سعيد: هههههه موجود يالنظيف ... يالله تعالوا مايسوا عليكم هالموتر
راكان: عادي لو تأخرنا المخرجة الشعشبونة مابتقول شي وانا الصراحة راسي يعورني باخذ موتر فويصل واروح البيت وارتاح
سعيد سكت وبعدين قال: يالله لا تتأخرون
راكان: يصير خير..
وبند عن سعيد ويكلم فيصل
راكان:مادري ليش متحرقص سعّود؟.
هي والله مادري مستعيل على رزقه...لا!! لا!!!
راكان: شبلاك؟ ها؟
فيصل: شالنه الهوا مثل عبوود بالخير ههههههه
راكان: هههههههه يا ريال !!!!!!
فيصل: شكلهم خلصوا المعاملات ...يالله انا ياخي بنسير انطالع العروس

واتحركوا بمواترهم والستاف والنعيشات والشباب كلهم صدوا ويطالعون الموتر الخطير ... وفيصل يضرب هرنات ... اونه يبا استقبال..
الشباب: اوووب!!! اوووب!!! اوووب!!!!
مياري فموترها واتطالع الموتر ومبطلة حلجها ( طبعا موتر العنود مخفي): ول!!! ول!!!! ول!!!
ووقف موتره ع ظهر موتر مياري ... ومياري عصبت لانها حركة مب حلوة بالمرة .. مع انها ماشافته عدلت عمرها ونزلت من موترها بدون ما تصد ورا .. وسارت صوب الستاف وكلمت محمد يجهز الكاميرات .. وتنرفز فيصل لانها ما يت صوبه .. سار صوبها والشباب اتيمعوا عند موتر فيصل ويا سعيد وهي تعطي التفاصيل وفجأة فيصل عند ظهرها
فيصل: السلام عليكم
مياري قفطت وحست شعر جسمها واقف لانه حد واقف جريب ظهرها: وعليكم السلام!!! محمد سير جهز الات التصوير ... لين اخلص وياه!!!
وفيصل رفع حواجبه لانها ما صدت صوبه وكلمة وياه ( وياه!!! جيه اشو تتحريني!!!) وقال: اااي انتي!!! انا مب وياه!!! انا الشيخ فيصل!!!عيبج ولا مب عايبنج مايهمني!!!
ومحمد قفط وسار بعيد يجهز الالات ومياري قفطت واحمر ويهها وصدت صوبه
مياري: ليش اتحرى عمرك منو؟ الشيوخية مب كلام فعل يا طويل العمر!!!!
فيصل ومنصدم: مارية؟؟؟
احمر ويهه وقلبه يدق بطريقة مب طبيعية...
مياري بعفوية: ها؟ من وين تعرفني؟
فيصل يطالعها ومب مصدق وفخاطره: ماريه؟ ياويل حالي عليج ...يعلني افداج .. كنت اتمنى اي لحظة اتحسين فية وسبحان الله ... الله يابج لين عندي!!!
مياري فخاطرها: احين هذا اللي اتضاربت وياه في التيلفون!!! اسميه شيوخي ابا عن جد !! عليه خشم سليل وعيون يا ويلي على العيون ... وجسم رياضي .. بس اللسان مخرب عليه!!!
وسعيد ربيع فيصل شافهم من بعيد يتكلمون وضحك ضحكة عالية الكل سمعها: هاهاهااااااااااااي!!!!!
كلهم خافوا والشباب بعد: شبلاك ياريال ينيت!!!
ومياري وفيصل صدوا فجأة على ضحكته .. وفيصل رفع حواجبه وعطى سعيد نظرة اتقول: شو مشكلتك؟؟
سعيد بصوت عالي: السموحة !!! السموحة!!!
سعيد فخاطره: التقوا وفكونا من الصدعة هههه ما يسوا عليهم!!!
مياري ضحكت على طريقة فيصل لانه ويهه كان يضحك .. وهو يشوفها ويقول فخاطره: ياويلي عالعيون والابتسامة ... يعلني افداج انتي واهلج وجبيلتج كلها...
فيصل يطالعها وفخاطره ما يبا يخليها بس لازم يثقل .. اعتدل فوقفته ويكلمها: مارية ممكن نبدا التصوير؟
مياري ونست عصبيتها: ان شاء الله خمس دقايق .. ولو سمحت ترمس اليويلة يتفضلون على هذي البقعة !!!
فيصل طالع عيونها وابتسم ونزل راسه: فالج طيب..

مياري فخاطرها : ههههه شو سالفته كان ياي بشراع وميداف .. الحينه عيونه وايد تتكلم .. لا يكون معجب؟ بس فية؟ انا؟ ليش؟ من حلاتي؟؟!!! لازم اخلص شغلي وبعدين افكر بهالشي !!! عوذ بالله لازم مااكون مثل سارة!!!
وكملت شغلها وتعبت وياهم لانه الشمس حارة .. ووصل الباص ومياري اول ما وصل الباص وقفت تصوير لانها كانت الساعة 4 العصر وكانوا يواعة ومحد قدر يرمس غير الصغارية .. لانه مياري كانت شديدة وعصبية وياهم لانها تبغي الشغل يكون التمام التماموفيصل كان كل ماتسنح له الفرصة يتريا نظرة منها او استجابة عل وعسى ترد عليه... بس هي ماخلت له فرصة لانها حاشمة عمرها من الكلام ...وراحت صوب الباص.. امها ماقصرت طرشت لهم الغدا ونادت محمد والستاف يفازعونها .. حتى الحصير فرشته .. والشباب يقولون حق بعض: اوووب برزة!!!
فيصل يكلم الشباب: احشموا عماركم
وراحت مياري هي والبنات وفرشوا الحصير عند الباص للشباب وفرشوا الحصير الثاني حذال موتر مياري عسب مايبين.. وغرفت للشباب والستاف الغدا .. وودوا الباجي للبنات...
فيصل يكلم سعيد: وحليلها حسّرت عن ايدها .. وفزعت صدق انها حرمة!!!
سعيد: هي والله يا حظك!!!
مياري سايرة صوبهم : اقربوا وسامحونا...
سعيد: الا ما قصرتي
مياري: لا والله الموجود ( ونزلت راسها وراحت صوب البنات)
فيصل ينادي سعيد الصغير : احم احم!!!
مياري سمعت تحنحينة فيصل بس ما ردت
فيصل: سعيد !!! تعال هني !!! احيد ريال تعال اتغدى ويا الرياييل!!
فهذيجي اللحظة صدت مياري وخلت سعيد يسير صوبهم وهي تضحك وهو يضحك
سعيد : انا اصلا ليّال
والبنات الصغار: ونحان بنسير وياه !! نحن رياييل!!!
فيصل ضحك هالمرة بصوت عالي هو والشباب
مياري: اها!!!انتوا حريم انف عليكن تعالوا ويايه!!!
وروحوا وياها وخلصوا الغدا وشكلهم ثقلوا في الاكل
واحد من الشباب اسمه حمدان: تسلم ايد اللي طبخت الغدا
مياري وكانت مخلصة الغدا وسمعته وسارت صوبهم: واذا قلت لك الطباخ مسوي الغدا؟؟
وقفط الريال وضحكوا الشباب عليه
مياري : ههههههههه اتمصخر وياك لا الوالدة اللي طابخة!!!
حمدان ويتدارك الموضوع: اشوا !!! ها شو قلت لكم؟؟؟ الله يخلي الوالدة
مياري : امين ... ممكن نروح البيت لانه الصراحة باجر بنكمل شغلنا ... وبيكون اخر يوم ... شدوا حيلكم
فيصل فخاطره: ياربي يعني ما بشوفج لين باجر؟
فيصل: خلاص الشيخة باجر بنتلاقى بس على الساعة كم؟
مياري: على الساعة 8 الصبح ممكن ما نتأخر ؟ لانهم كلهم ما قصروا يفازعون ويايين من الفجر الا!!!
سعيد قاطعها: مايصير خاطرج الاطيب

ورمست الستاف ... وفيصل ماشل عيونه من عليها...
سعيد يضرب بايده على ذراع فيصل: اووه اووه!!! وين سرحت ماوحالها البنية توها بتركب الموتر!!!
فيصل: ياخي هدني!! اول مرة استانس جذيه!!! ياناس همومي انشلن من حياتي ومياري اتربعت فقلبي..
سعيد: ياخي شبلاك؟ اول مرة اتشوف بنية؟ قلنا متخبل عليها لكن مب جذيه!!!
سعيد فخاطره: مافية اطري راكان عن اعكر مزاجه!!!
فيصل: انا بتحرك بموتري .. لاني اشوف خلق الله خلصوا
سعيد: الا شفت مارية اتشغل موترها!!!
فيصل: ويهد!!! سير اركب موترك اها!!!
سعيد: ههههههههه ان شاء الله طويل العمر....
وركبوا مواترهم .. ومالحق ...فيصل يتصل بمياري .. وهي شافت رقمه .. وردت: الو؟؟
فيصل: مرحبا؟ مارية بغيت اقولج باجر مابتصور لاني اليوم وايد رزفت .. وبخلي حد بدالي
مياري فخاطرها:اوهوه هذا داخل بشراع وميداف مول ماعنده اسلوب...
مياري: اها!!! اصلا خلاص نحن مب محتايين لبديل انته كفيت ووفيت بس نبا الرزيفة وخلاص!!!
فيصل فخاطره: ياربي جافة ويايه!!! عنبوا حني علية شوي؟؟
فيصل: خلاص السمووحة يالله فمان الله
مياري : الله يحفظك
فيصل يسرع بموتره ومتضايج من كلامها ... عنبوا هي مول مب مسويه له سالفة.. ووصلت بيت خالتها ونزلت الصغارية وروحت البت ويوم وصلت حست جسمها متكسر...
ويرن تيلفونها وتطلع العنود مطرشتلها مسج: الغلا تسلم عليج واتقولج تصبحين على خير وباجر بنتفاهم وياقصة حبج ويا فيصل...

وتضحك مياري واتقول: الخبال في العايلة ههههههه
واتفكر باللي صار اليوم في البداير .. وانها غبية ترد عليه هالرد .. بس كانت ردودها عفوية... ويصيح فجأة تيلفونها وفخاطرها: اكيد عنودوه مارامت تتريا لين باجر
وردت بدون ماتشوف الرقم
مياري: عنودوه مب متفيجة لسوالفج روحي متكسرة من الشغل!!!
هند: سلامتج من التكسير ههههههههه!!!
مياري وشافت الرقم وهي متفاجأة: اووييييه سوري منو؟
هند: ان هنودة ... اخت راكان
مياري واحمر ويهها: يامرحبا وسهلا ... نوّر التيلفون ههههههههههه
هند: هههههههه وصاحبته!!!
وسولفوا ويابعض ... وبعد فترة سكتوا فجأة.. واتكلمت عقب هند
هند: مياري انا مثل اختج وحبيت اقولج انه راكان يباج يعني يبا يخطبج ... انتي شو رايج؟
مياري: هنودة .. ادري انه يباني ... بس خلاص انتهى كل شي ومابغي حد يفتح الموضوع اسفة انا ما اباه!!!
هند متكدرة: متأكدة؟ فكري دخيلج الريال شارنج!!!
مياري: غناتي ... انا لو افكر .. راسي بيعورني وسالفة راكان منتهية خلاص
هند: عيل السموحة منج انا بدور له على وحدة .. بس اتقولين انها عن طريقج...
هند: مثلج مابيحصل!!!
مياري: واحسن عني باخلاقها!!! صبري انتي !!!
هند: خلاص يالله من اتحصلينها اتصلي فداعة الله
مياري: فداعة الرحمن
بندت عنها وحست انه هم وانزال عن راسها وقلبها ... وراحت اتسبحت وصلّت
مياري اتكلم عمرها: بتيّم تيلفوني عن اسهى...
وتدور صورة فيصل فبالها .. وكيف كان يكلمها بتعجرف عن الشيوخية.. وتتذكر ملامحه ... لين انمت

(عند فيصل)
فيصل يدق الباب الحوي بقوة يبا يخوفهم والجرس حرقه
ام فيصل: روز!! روز!!! غربالله مذهبج !!! سيري فجي الباب !!! عنبوا حرقتوا الجرس !!! هيدوا هيدوا!!!روز ويهّد!!!
روز اترمسها وهي في الحمام : ماما كمس دكايك انا في سبّح!!!
ام فيصل: وابويه عليج جني انا الخدامة ماعليه!!!من تخلصين تعالي يامسودة الويه!!!
وسارت ام فيصل اتبطل الباب وفيصل يدق..
ام فيصل: هالله هالله بالباب!!! بتعجونه عللية هيدوا!!!!
فيصل من سمع صوت امه زاغ ووقف حذال الباب يبا يخوفها
ام فيصل بطلت الباب وفيصل ظهر فويهها
فيصل بصوت عالي: واااااااااااااااع!!!
ام فيصل قفزت وقالت: توعوع حلجك وانكسر فجك قول امين!!! لعنبوا شو هالمذهب؟؟
فيصل: مذهب الشيوخية!!!! هاهاهاي
ام فيصل: لا حول ولا قوة الا بالله .. الله يهديك يابويه !!! عجيت قلبي!!!
فيصل ويبوسها ع راسها: سلامة راسج .. يعله قلبي ولا قلبج!!!

هههههههه

والله ها الفيصل

عجييييييب

يسلمو ونتريا التكملة

بس في المرة الثانية حبيبتي كبري الخط

ترى عيونا ضغيييييرة وما تشوف الخط الصغير ههه

حليييييييييييله

تسلمين حبيبتي

نتريا التكملة

ثاااااااااااانكس على ردودكم الحلوة

eL 3afoW

ثاااااااااااانكس نتريا التكملة

العفو